Sorg, sinne og skaparkraft

– Eg skreik masse til Gud. Eg hugsar ein gong eg gjekk ut på ein åker og sa «no skal eg slåst med deg Gud».

Det fortel mannen på den svarte kontorstolen i det elles kvite og sterile kontoret i øvste etasje av eit sentrumsbygg i hovudstaden.

Joakim Magnus kallar seg eit «prosjektmenneske», som elskar å starte ting og få det til å «gå». Og drivkrafta er Gud. Det har det vore sidan han var omtrent sju år gammal og kjente eit kall til misjon etter eit misjonsmøte på Grimerud gard.