Kjempa for kvinners rett til presteteneste – no er Mari Saltkjel tilsett som prost
DEN NORSKE KYRKJA: Bjørgvin bispedømme har hatt utfordringar med motstand mot kvinnelege prestar. No har Nordfjord tilsett ny prost, sokneprest Mari Saltkjel, som har vore ei tydeleg stemme i saka.
– Eg kjenner at det er ei stadfesting av noko som eg visste om på førehand, men som er godt å sjå likevel, nemleg at Bjørgvin bispedøme og distrikta der er ein stad der også kvinner får høve til å leie. Det må me leggje merkje til. Eg er stolt, glad og audmjuk, for å få dette tilbodet.
Det seier Mari Saltkjel, som bispedømerådet i Bjørgvin i dag tilsette som prost i Nordfjord prosti. Då Vårt Land ringjer har ho heilt nyleg fått telefonen frå biskop Halvor Nordhaug med den glade bodskapen. Saltkjel er i dag sokneprest i Vågsøy.
– Eg har sjølvsagt vore veldig spent. Og etter at eg sende søknaden har eg kjent på at det betyr veldig mykje for meg, både som prest, kvinne og stolt feminist.
Biskop i Bjørgvin, Halvor Nordhaug meiner Nordfjord vil få ein nytenkjande og dynamisk prost i Saltkjel.
– Og så er ho ein god teolog og ein folkekyrkjeprest som er veldig flink med folk. Eg gler meg til å samarbeide med henne, seier Nordhaug.
Ei tydeleg stemme
I fjor kom det i ei arbeidsmiljøundersøking fram at Bjørgvin var det bispedømet der størst del av dei tilsette meldte om krevjande kollegarelasjonar grunna ulikt syn på kvinnelege prestar.
Eg opplever å ha blitt lyfta fram og heia på, sjølv om nokon oppfattar meg som tydeleg og radikal.
Mari Saltkjel
Saltkjel har vore ei tydeleg stemme i debatten, og har mellom anna tatt til orde for at alle prestar bør lova å samarbeide med alle kollegaar, og at Den norske kyrkja (DNK) bør gje kvinnelege prestar ei offisiell unnskyldning for måten ein har handtert mellom anna mannlege kollegaar sin reservasjon mot å jobbe med dei.
Fram til no har bispedømet ni mannlege prostar og to kvinnelege. Med Saltkjel som prost blir det tre kvinner i kollegiet.
– Det er viktig å få fleire kvinner inn i leiinga. Heldigvis aukar det på, men me har framleis plass til fleire, seier Nordhaug.
– Har blitt heia på
Då Saltkjel blei ordinert til teneste i 2008 var ho den fyste kvinnelege presten i prostiet, og no blir ho altså den fyrste kvinna som får tilbodet som prost på same stad. Og det er tydeleg at Saltkjel er glad i området.
– Eg har hatt det skikkeleg godt i Bjørgvin og i Nordfjord, både som kvinne og prest. Eg opplever å ha blitt lyfta fram og heia på, sjølv om nokon oppfattar meg som tydeleg og radikal. Det at den stemma eg har blir sett på som viktig i Bjørgvin er godt å kjenne på.
Saltkjel er tydeleg på at hennar kritikk i kvinneprestsaka har vore retta mot Den norske kyrkja generelt.
– Fryktar du reaksjonar frå kvinneprestmotstandarar på at du som har vore så tydeleg i denne saka blir prost?
– Eg opplever at eg er ynskt som prost i Nordfjord, og eg ser fram til å få høvet til å samarbeide med dei andre prestane, prostane og biskopen i Bjørgvin, seier Saltkjel.
Biskop Nordhaug seier Saltkjel har vore ein pådrivar for å lyfte fram kvinner si presteteneste, og for å rekruttere inn fleire kvinner i Bjørgvin bispedøme.
– Det er sjølvsagt ei oppgåve som eg har til felles med henne.
Marit Neset er journalist i religionsavdelingen i Vårt Land, og har jobbet i avisen siden 2021. Hun har to bachelorgrader, i journalistikk og interkulturell forståelse. Hun jobber mye med langstoff, menneskemøter og nyhetssaker fra Den norske kirke.
Ruth Einervoll Nilsen er journalist i religionsavdelingen i Vårt Land.
