Ungdomsfestivalen UL tek vare på bedehuskulturen med kyrkjekaffi, basar og fokus på misjon
Jens Gabriel (16) og Ivar Johannes (16) ynskjer sjølv å verte misjonærar som vaksne
Festivalen er den staden i Europa der flest vert sendt ut som misjonærar frå, meiner leiar Hans Kristian Skaar
– Det stinkar misjon her
Inne i ein møtesal er rommet fylt med ei duft av kaffi. På eit retro bord står det fat med kjeks og saft på broderte dukar med telys og blomar. På veggane heng det broderte veggteppe og rommet er lyst opp av gamle lampar. Ein skulle nesten tru at ein var på eit bedehus, men rundt borda sit kaffitørste UL-deltakarar klare for kyrkjekaffi etter morgonmøte.
Vi befinn oss i UL+ loungen, eit eige rom for unge vaksne over 22 år. Utanfor dette spesialdesigna rommet, er det litt meir liv og leven. Det er her dei fleste deltakarane er, ungdom frå heile landet frå 14 år og oppover.
– Kort fortalt så starta UL i 1947. Ein såg at ein hadde eit behov for ein landsleir for ungdom. Det var kanskje den første i Noreg. Det starta som Misjonssambandet sitt landsmøte for ungdom kor verdiane til organisasjonen gjennomsyra arrangementet, og det gjer det framleis.
Dette fortel Misjonssambandet ung sin leiar, Hans Kristian Skaar, som har hatt overordna ansvar for festivalen i 18 år. Ung Landsmøte (UL) er Norsk Luthersk Misjonssamband (NLM) og Indremisjonsforbundet (IMF) sin ungdomsfestival. Med to misjonsorganisasjonar er det eit tydeleg fokus på misjon på festivalen. Ikkje ulikt innhaldet ein kunne forvente på eit bedehus, forteljast det om misjonsarbeid rundt om i verda og ungdommen vert informert om og oppfordra til å gi pengar til misjonen.
Skaar meiner at UL er den staden i Europa flest vert sendt ut som misjonærar frå, og der flest unge melder seg til å gi fast til misjonen.
– Det stinkar misjon her, seier Skaar og ler.
Rundtomkring på festivalområdet heng det store, gule banner kvar det står «Festival som forandrer». Dette er slagordet til UL.
– Trur du at festivalen forandrar?
– Det har eg gleda av å sjå her. Ein av deltakarane som har gjort sterkast inntrykk på meg er ein fyr som reiste heilt åleine i 43 timar frå ei bygd oppe i Nordland. Han reiste med buss, båt og tog og kom hit heilt åleine. Han kjente ingen aktive kristne der han budde og fortalde at det å komme på UL gjorde at han kunne halde på den kristne trua si eit år til, seier Skaar.
Temaet for UL er i år HøyTid, med stor T.
– Høgtid handlar om to ting. Vi opplever ein ungdomsgenerasjon som opplev livet som veldig stressa, samtidig så har den gjennomsnittlege tenåringen over 9 timar i skjermtid. Vi tenkjer at bibelen har noko å formidle der, at Gud har lagt ned noko i skaparverket i forhold til minutt, timar, veker, månadar, årstider og kvile og arbeid som vi ynskjer å formidle, fortel Skaar.
– Vi som bedehusorganisasjon har ofte vore litt dårleg på høgtider. Medan kyrkja verkeleg feirar høgtidene med gudstenester dag etter dag, så stikk bedehusfolket på fjellet på hytta. Vi vil sørgje for at ungdommane får sjå noko av det sentrale i høgtidene som står om i bibelen.
Misjonsfokuset har sida UL først starta i 1947 gjennomsyra arrangementet og dei heldt fast på mange tradisjonar, samtidig som dei ynskjer å prøve ut nye ting. Dei siste åra har dei laga eit nytt opplegg for unge vaksne over 22 år; UL+. I år er det første gong det er eit eige tilbod heile veka.
– Det finst få liknande tilbod for oss som er unge vaksne frå 22 år og oppover, seier Margrete Sørbø (25).
Ho er leiar for UL+ og fortel at ho opplev at det er både deltakarar som har eit nært forhold til UL og som ikkje har det, men at ein del av UL+-deltakarane er folk som på eit tidspunkt har tenkt at dei vart for gamle for UL.
Sørbo tenner lyset som står på den broderte duken på bordet før ho seg ned i ein brukt sofa. På andre sida av bordet sit Martin Augestad som er festivalsjef for andre året på rad. Han har vore på UL heilt sidan han var gamal nok til å delta, og han meiner at misjonsfokuset er viktig. UL+-loungen ber tydeleg preg av bedehusestetikken, noko mange deltakarar truleg kjenner seg heime i. Sørbø fortel at møblane er lånt frå Gjenbruken til NLM, og at det difor vert slik estetikk.
Han håpar og trur at bodskapen om misjon når inn til ungdommane og opplev at det har vore eit auka misjonsfokus blant unge i Noreg og viser til misjonskonferansen The Send som vart arrangert nasjonalt i fjor og lokalt i år.
Visjonen til UL er at vi ynskjer å vere ein festival som forandrar. Punktum.
Martin Augestad, festivalsjef
Onsdag kveld var det humorshow for UL+ deltakarane. Her avslørte dei angiveleg agendaen til UL+, nemleg at det ikkje lenger skulle vere så mange single, unge vaksne i miljøet. Torsdag kveld var det swingkurs som sto på UL+-programmet, og samtidig vart det arrangert basar.
– Er swingkurset ein del av denne agendaen til UL+ om å få færre single?
– Det er ikkje agendaen, og det er eigentleg veldig viktig for meg, seier Sørbø medan ho og Augestad ler.
Det er trass alt ikkje eit singeltilbod. På UL+ er både single, gifte, og ein babykrok.
– Visjonen til UL er at vi ynskjer å vere ein festival som forandrar. Punktum. Ikkje sivilstatusar, seier Augestad og ler før han vert litt meir seriøs.
– Vi tenkjer at UL har ein djupare intensjon om at menneske skal oppleve å verte forandra av Jesus og bodskapen som bibelen snakkar om. Vi trur at det er meir enn berre ein interessant historie, det er ein livsforvandlande bodskap.
