Samla inn 100.000 til 50-årsdag
Til 50-årsdagen bad Møre-biskop om pengegåver til presteutdanning i Etiopia.
Biskop i Møre, Ingeborg Midttømme, hadde éi gåve på ønskelista då ho i november fylte 50 år: Pengar til å styrkje presteutdanninga i Etiopia. Så langt har ho fått 105.000 kroner, skriv avisa Dagen.
Pengane kjem frå privatpersonar, vener og kollegaer. Den største enkeltgåva er på 25.000 kroner. I tillegg har fleire kyrkjelydar på Møre samla inn kollekt til dette føremålet, men pengane er enno ikkje levert. Difor er den samla summen venta å stige.
Midttømme er tidlegare leiar i Presteforeningen, og der jobba ho med eit prosjekt for å styrkje kompetansen til etiopiske prestar. Pengane Midttømme no samlar inn, skal gå til å opprette ei doktorgrad i teologi.
