Blir nekta å frakte inn mat
Den norske hjelpeorganisasjonen Partners prøver å få inn mat til flyktningleirar, men blir avviste.
– Vi opplever at dei driv utsvelting, fortel Oddny Guamer. Ho leiar Partners, som lenge har drive hjelpearbeid i Myanmar, i fire delstatar som alle er heimsøkte av konfliktar.
Å sitje i Norge og følgje hjelpe-arbeidet, er vanskeleg no om dagen, vedgår Gumaer:
– Eg er nesten på gråten når eg snakkar med deg om dette.
LES MEIR Ho strevar med lovnadane
Litt ris
Akkurat no er det verst i delstaten i vest, i Rakhine. Her jobbar Partners i flyktningleirane som blei oppretta etter at det førre opprøret braut ut i 2012.
– Fram til konflikten blussa opp att i august, var det frykteleg vanskeleg å få inn mat i leirane. No er det nesten uråd, fortel Gumaer.
Men nyleg klarte organisasjonens folk i Rakhine å få inn 5.000 tonn ris, via bakvegar og med hjelp av gode kontaktar.
– Fleire fekk omsider mat, men det monnar så lite.
Sperrar vegar
Fram til Rakhine blei hermetisk lukka no i haust, delte Partners ut ris, medisinsk støtte, telt for husly, samt frø og gjødsel for å kunne etablere ei meir berekraftig matforsyning.
No står medarbeidarane og stangar mot dei som sperrar vegane inn i delstaten, inn i flyktningleirane.
– Kven er det som vaktar vegane inn i Rakhine?
– Vi møter politi og soldatar frå hæren.
Leiarskap
Oddny Guamer fekk med seg bodskapen i talen Aung San Suu Kyi heldt i går, ein tale som minna henne om orda fredsprisvinnaren brukte i den forseinka nobeltalen i 2012.
– Eg var i Myanmar i 2015, under parlamentsvalet Aung San Suu Kyi vann. Eg var saman med rohingyaar, som var særs lukkelege. «Endeleg får vi ei som vil tale vår sak», sa dei. Og blei kraftig skuffa, fortel Gumaer.
– Kva seier du om Aung San Suu Kyis leiarskap?
– Eg kan forstå at ho har ein krevjande balansegong. Men eg kan slett ikkje forsvare henne i denne siste runden, seier Gumaer og etterlyser eit meir myndig leiarskap, som strekkjer ut ei hand til Myanmars minoritetar.
Fordi rundt 400.000 rohingyaar har flykta til Bangladesh, har Partners starta hjelpearbeid i flyktningleirar der også.
Bjørgulv K. Bjåen er journalist i nyhendeavdelinga i Vårt Land. Han har arbeidd i Vårt Land sidan 1992 og har tidlegare vore deskjournalist, vaktsjef, nyhendeleiar og samfunnsredaktør (nyhenderedaktør) i avisa. Han skriv særleg om asyl-, flyktning- og integreringspolitikk, oppvekst og utanriks – og konsekvensar av vedtak i regjeringa og Stortinget.
