Det er typisk norsk å eige naturressursar
I ei usikker verd er det lite som er så klokt som å sørge for at det norske fellesskapet eig naturressursane saman.
Dette er ein leiar. Leiaren gir uttrykk for Vårt Lands syn. Sjefredaktør og politisk redaktør har ansvar for innhaldet.
Nyheita om at staten kjøpte Meraker Brug førre veke, fekk blanda mottaking i det politiske miljøet. Høgresida, ved Frp-leiar Sylvi Listhaug, er sterkt kritiske til kjøpet. Ho meiner kjøpet signaliserer at «statskapitalismen er tilbake».
Det er ei kortsiktig og uklok haldning.
Akkurat no står verda i fleire store kriser, og der mykje handlar om tilgangen på naturressursar. Fleire bekymrar seg for om landa deira kan produsere nok mat og energi. I eit slikt perspektiv er statens kjøp i Trøndelag ekstra interessant: Meraker Brug er ein eigedom som er kring tre gonger større enn Oslo kommune, med enorme jaktområde, mykje skog og vasskraft-ressursar som kan bli utnytta.
Klassisk norsk
Det er ein klassisk norsk verdi at fellesskapet eig desse ressursane saman.
På mange måtar kan det bli samanlikna med strategien Norge valde i Nordsjøen: Vi har tent godt på avgjerdene om at pengane i stor grad skulle tilbake til fellesskapet. Det var ei langsiktig og klok tenking som låg bak.
Partia på høgresida burde derimot bruke litt tid på å reflektere over sin respons på oppkjøpet av Meraker Brug, og vise fram kva alternativ strategisk linje dei vil legge seg på i spørsmåla om oppkjøp av norske eigedommar.
Vårt Land
Norge vert ikkje eit kommunistisk eller sosialistisk diktatur ved at staten sikrar eigarskap til felles naturressursar. Det er tvert imot i tråd med lange linjer i norsk politikk som har gjort landet vårt til eit av verdas beste å bu i.
I Norge har det i lengre tid vore ei naiv og lite framtidsretta haldning til oppkjøp av utanlandske eigarar. Fleire strategisk viktige eigedommar har dei siste åra vorte oppkjøpt av utlendingar, utan at det har vore eit strategisk ønske om dette frå norske styresmakter.
Alternativ linje
Derfor er det viktig at Senterpartiet og Arbeidarpartiet no stansar denne utviklinga. At dei i tillegg sikrar fellesskapet tilgang til desse ressursane, er attkjenneleg politikk frå dei to partia til venstre for midtstreken i norsk politikk.
Partia på høgresida burde derimot bruke litt tid på å reflektere over sin respons på oppkjøpet av Meraker Brug, og vise fram kva alternativ strategisk linje dei vil legge seg på i spørsmåla om oppkjøp av norske eigedommar.
